Breaking News

திரண்ட தமிழர்கள்: பின் வாசல் வழியாக ‘ஓட்டம் பிடித்த’ ராஜபக்சே!

November 30, 2010 by  
Filed under உலகம் & இலங்கை

திரண்ட தமிழர்கள்: பின் வாசல் வழியாக ‘ஓட்டம் பிடித்த’ ராஜபக்சே!

லண்டன்: ஆயிரக்கணக்கான தமிழ் இளைஞர்களின் ஆவேச எதிர்ப்பைப் பார்க்க விரும்பாமல் லண்டன் விமான நிலையத்தின் பின்வாசல் வழியாக எஸ்கேப் ஆனார் இலங்கை அதிபர் ராஜபக்சே.

இலங்கைக்கு அதிபராக இருந்தாலும், சர்வதேச சமூகத்தின் முன் ஒரு போர்க் குற்றவாளியாகவே பார்க்கப்படுகிறார் ராஜபக்சே.

இந்த முத்திரையை அகற்ற அவர் தாமாகவே பல்வேறு நாடுகளுக்கு விருந்தினராகச் செல்கிறார். அங்கெல்லாம் இலங்கையில் நடந்தது போர்க்குற்றமல்ல என்கிற ரீதியில் உரையாற்றுவதை வழக்கமாகக் கொண்டுள்ளார்.

இந்த முறை பிரிட்டனில் உள்ள ஆக்ஸ்போர்டு பல்கலைக் கழகத்துக்கு தனிப்பட்ட முறையில் பயணம் மேற்கொண்டுள்ளார் ராஜபக்சே. போர்க் குற்றம் சுமத்தப்பட்டுள்ள அவர் கைதாகக் கூடும் என்று எச்சரிக்கப்பட்டதால் முன்பு பயணத்தைத் தள்ளிப் போட்டவர், இப்போது துணிந்து பயணம் மேற்கொண்டுள்ளார்.

தனது அமைச்சர்கள் மற்றும் அதிகாரிகள் குழுவுடன் லண்டன் விமான நிலையத்தில் நேற்று வந்திறங்கிய மகிந்த ராஜபக்சேவுக்கு பெரும் அதிர்ச்சி காத்திருந்தது. காரணம் அங்கு கடும் குளிரையும் பொருட்படுத்தாமல் ஆயிரக்கணக்கான தமிழ் இளைஞர்களும், பெண்களும் திரண்டிருந்தனர்.

வெறும் செல்போன் அழைப்பு மற்றும் குறந்தகவல்கள் மூலம் மட்டுமே இவ்வளவு தொகையான மக்களைத் திரட்டியிருந்தனர் புலம்பெயர் தமிழர்கள்.

நேரம் ஆக ஆக குவியத் தொடங்கிவிட்ட தமிழர் கூட்டம் கண்டு, விமான நிலைய காவல் அதிகாரிகள் செய்வதரியாது திகைத்து நிற்க, தமிழீழ தேசியக் கொடி ஏந்தியவாறு மக்கள் “போர்க் குற்றவாளி மகிந்த… போர்க் குற்றவாளி மகிந்த திரும்பிப் போ”, “இனப் படுகொலைகாரனுக்கு இங்கே என்ன வேலை?” என பெரும் குரல் கொடுத்து போராட்டம் நடத்தினர்.

மனித உரிமைகளை மதிக்கும் ஒரு நாட்டில், அதை காலில் போட்டு நசுக்கிய ராஜபக்சேவை அனுமதிப்பதா? என்றும் கோஷமெழுப்பினர்.

இந்த கோஷத்தில் ஹீத்ரு விமான நிலையமே பெரும் பரபரப்புக்குள்ளானது.

போராட்டக்காரர்களை முதலில் அணுகிய காவல் துறையினர், இங்கு போராட்டம் நடத்த அனுமதி இல்லை. இருப்பினும் உங்களை இப்போது அனுமதிக்கிறோம். அமைதியாக எதிர்ப்பைக் காட்டுங்கள், என்று கூறிவிட்டுச் சென்றனர்.

விமானத்திலிருந்து இறங்கிய ராஜபக்சே, சிறிதுநேரம் உள்ளே இருந்துவிட்டு பின்னர் விமான நிலையத்தின் பின்வாசல் வழியாக அவசர அவசரமாக வெளியேறிவிட்டார்.

வெளியில் கூடியுள்ள தமிழர் கூட்டத்தைப் பார்க்க வேண்டாம் என்று அவர் கூறியதாலேயே மாற்றுப் பாதையில் அழைத்துச் செல்லப்பட்டதாகத் தெரிவிக்கப்பட்டது.

மிரண்ட சிங்களர்

கடைசியில் மகிந்தவுடன் விமானத்தில் வந்த சிங்களவர்கள் மட்டும் முன்வாசல் வழியாக வெளியில் வந்தனர். ஆனால் அங்கு திரண்டிருந்த தமிழ் மக்களையும், தமிழ் தேசியக் கொடியையும் பார்த்து மிரண்டு, சுவரோரம் பம்மியபடி வெளியேறிய அவர்களுக்கு தமிழர்கள் எந்த தொந்தரவையும் தரவில்லை.

இந்த திடீர் போராட்டத்தில் தமிழ் இளையோர் அமைப்பு, பிரிட்டன் தமிழர் பேரவை உறுப்பினர்கள், நாடுகடந்த தமிழீழ அரசாங்க பிரதிநிதிகள், மற்றும் பொதுமக்கள் என அனைவரும் கலந்துகொண்டிருந்தது குறிப்பிடத்தக்கது.

இந்தப் போராட்டம் குறித்து ஒரு தமிழர் கூறுகையில், “இங்கிலாந்து பிரஜைகளான நாங்கள், இந்த நாட்டுக்குள் ஒரு போர்க்குற்றவாளி வருவதை வேடிக்கை பார்த்துக் கொண்டிருக்க முடியாது என்று எங்களது அரசுக்கு உணர்த்தவே இப்போராட்டத்தை நடத்தினோம்.

40 ஆயிரம் அப்பாவி மக்களைக் கொன்ற ஒரு கொலையாளி, போர்க்குற்றவாளி இலங்கையின் அதிபர் என்பதை இந்த நாட்டு மக்கள் உணர வேண்டும் என்பதற்காகவே இந்தப் போராட்டம்,” என்றார்.

மிகப் பெரிய அளவில் தமிழர்கள் திரண்டு நின்றதைப் பார்த்த பலரும் தங்களது செல்போன்களில் அவர்களை ஆர்வத்துடன் படம் எடுத்தனர். பலர் போராட்டம் நடத்தியவர்களிடம் வந்து பேசி என்ன என்று கேட்டறிந்து கொண்டனர்.

5000 பேருக்கு மேல் திரண்டிருந்த போதும், மிகக் கட்டுப்பாடாக நடந்து கொண்ட தமிழர்களுக்கு பிரிட்டன் போலீசாரும் நன்றி தெரிவித்துக் கொண்டனர்.

அடுத்த ஆர்ப்பாட்டம்…

இதுதவிர, வரும் 2-ஆம் தேதி ஆக்ஸ்போர்ட் பல்கலைக் கழகத்தில் ராஜபக்சே உரையாற்றவுள்ளதால், அப்போது இதை விட அதிகமான தமிழர்கள் அங்கு கூடி தமது எதிர்ப்பை தெரிவிப்பார்கள் என அறிவிக்கப்பட்டுள்ளது.

மேலும், போர்க் குற்றவாளி ராஜபக்சேக்கு எதிரான தங்கள் குற்றச்சாட்டுகள் மற்றும் கோரிக்கைகளை கீழுள்ள சுட்டியை அழுத்தி, 300 சொற்களுக்கு மிகாமல், சுருக்கமாக பிரிட்டிஷ் வெளியுறவுத் துறை அமைச்சகத்துக்கு அனுப்புமாறு தமிழர் அமைப்புகள் வேண்டுகோள் விடுத்துள்ளன.

British Foreign & Commonwealth Office

வைகோ, பழ நெடுமாறன், சீமான், நல்லக்கண்ணு கைது!

June 8, 2010 by  
Filed under General

வைகோ, பழ நெடுமாறன், சீமான், நல்லக்கண்ணு கைது!

செருப்பாலடித்து.. ராஜபக்சே கொடும்பாவி எரிப்பு

சென்னை: ராஜபக்சே இந்தியா வருவதை எதிர்த்து தலைநகர் சென்னை மற்றும் தமிழகத்தின் பல பகுதிகளில் மதிமுக உள்ளிட்ட கட்சிகள், தமிழர் அமைப்புகள் சார்பில் ஆர்ப்பாட்டம், ரயில் மறியல், கொடும்பாவி எரிப்பு உள்ளிட்டவை நடத்தப்பட்டன. இதில் ஆயிரக்கணக்கானோர் கைது செய்யப்பட்டனர்.

சென்னையில் நடந்த போராட்டத்தின்போது இலங்கை தமிழர் பாதுகாப்பு இயக்கத்தைச் சேர்ந்த பழ.நெடுமாறன், வைகோ, நல்லகண்ணு, இயக்குநர்கள் சீமான், டி.ராஜேந்தர் உள்ளிட்டோர் கைதாகினார்கள்.

இலங்கையில் தமிழர் இன அழிப்பை நடத்திய ராஜபக்சே இன்று இந்தியா வருகிறார். சர்வதேச அரங்கில் போர்க்குற்றம் சுமத்தப்பட்டுள்ள அவர், இந்தியாவில் ராஜ மரியாதையுடன் 3 நாள் பயணம் மேற்கொண்டிருப்பதைக் கண்டித்தும், அவரை வரவேற்கும் இந்திய அரசைக் கண்டித்தும் தமிழகத்தில் பல்வேறு கட்சிகள், தமிழர் அமைப்புகள் இன்று போராட்டத்தில் குதித்தன.

இலங்கை துணைத் தூதரகத்தை முற்றுகையிட்டு ஆர்ப்பாட்டம் நடத்தப் போவதாக இலங்கைத் தமிழர் பாதுகாப்பு இயககம் அறிவித்திருந்தது. இந்தப் போராட்டத்திற்குப் போலீஸார் தடை விதித்திருந்தனர்.

இருப்பினும் தடையை மீறி பேரணியும், போராட்டமும் நடைபெறும் என வைகோ அறிவித்திருந்தார். அதன்படி இன்று காலை பத்து மணியளவில் மயிலாப்பூர் நாகேஸ்வரராவ் பூங்கா அருகே ஆயிரக்ணக்கான தொண்டர்கள் திரண்டனர்.

வைகோ, பழ. நெடுமாறன், நல்லகண்ணு, நடராஜன், விஜய டி.ராஜேந்தர் உள்ளிட்டோர் தொண்டர்களிடையே பேசினர். இனப்படுகொலை செய்த கொடுங்கோலன் ராஜபக்சே ஒழிக என்பது உள்ளிட்ட பல்வேறு கோஷங்களை முழக்கினர்.

இந்த ஆர்ப்பாட்டத்தில் பேசிய வைகோ, மத்திய அரசையும் முதல்வர் கருணாநிதியையும் கடுமையாக தாக்கினார்.

மேலும் அவர், “ஈழத்தமிழர்கள் நாதியற்றவர்களா? நீங்கள் எது செய்தாலும் கேள்வி கேட்காமல் இருப்பதற்கு. உலகம் முழுவதும் அவர்களுக்கு ஆதரவு இருக்கிறார்கள்.

மாவீரன் பிரபாகரனை பெற்ற தாய் பார்வதி அம்மாள் இந்தியாவுக்கு வர அனுமதி தரவில்லை. ஆனால் ராஜபக்சேவுக்கு மட்டும் சிகப்பு கம்பளம் விரித்து வரவேற்பது கொடுமை. ஏன் இந்த இனதுரோகம்?’’ என்றார்.

பின்னர் அங்கிருந்து இலங்கை துணைத் தூதரகம் நோக்கி பேரணியாக கிளம்பினர். இதையடுத்து அவர்களை போலீஸார் தடுத்து நிறுத்திக் கைது செய்தனர்.

சீமான்…

சென்னை சாஸ்திரி பவன் முன்பு நாம் தமிழர் இயக்கத்தின் சார்பில் ஆர்ப்பாட்டம் நடந்தது. அவ்வியக்கத்தின் தலைமை ஒருங்கிணைப்பாளர் சீமான் இந்த ஆர்ப்பாட்டத்திற்கு தலைமையேற்றார்.

ஆர்ப்பாட்டத்தின் போது சிமான், “இந்தியா வரும் ராஜபக்சேவை வன்மையாக கண்டிக்கிறோம். தமிழின எதிரியை எப்படி இந்தியாவுக்குள் அனுமதிக்கலாம்? இத்தனை வருடங்களாக இந்த விழாவை இலங்கையில் நடத்தாத அந்நாட்டு அரசு. இப்போது மட்டும் ஏன் இந்த விழாவை நடத்துகிறது?

இந்த விழா மூலம் தமிழர்களை படுகொலை செய்த ரத்தக்கறையை கழுவப்பார்க்கிறார் ராஜபக்சே. அதனால்தான் இப்போது இந்த விழாவை நடத்துகிறார்.

அவரின் சூழ்ச்சியை புரிந்துகொள்ளாமல் போகக்கூடாது என்றுதான் நடிகர்களை எதிர்க்கிறோம்” என்று ஆவேசமாக முழக்கமிட்டார்.

தமிழகம் முழுவதும் ஆயிரக்கணக்கில் கைது

இதேபோல, சென்னையில் இலங்கைத் தூதரகம் நோக்கி பேரணியாக செல்ல முயன்ற புதிய தமிழகம்கட்சியினர் கைது செய்யப்பட்டனர்.

ஓசூரில் போராட்டத்தில் ஈடுபட்ட பெரும் திரளான மதிமுக, தமிழ் தேசிய பொதுவுடமைக் கட்சியினர் கைது கைது செய்யப்பட்டனர்.

திருச்சியில் ராஜபக்சேவின் கொடும்பாவியை சிவசேனா கட்சியினர் தீவைத்து கொளுத்தினர். இதையடுத்து 13 தொண்டர்களை போலீஸார் கைது செய்துஅப்புறப்படுத்தினர்.

திருப்பூரிலும் சிவசேனா கட்சியினர் ராஜபக்சே கொடும்பாவி எரித்துக் கைதாகினர்.

இங்கு முன்னெச்சரிக்கை நடவடிக்கையாக 30 மதிமுகவினர் கைது செய்யப்பட்டனர்.

நாகர்கோவில் சரத்குமாரின் அகில இந்திய சமத்துவ மக்கள் கட்சி சார்பில் ராஜபக்சே கொடும்பாவி எரிக்கப்பட்டது. இதையடுத்து அக்கட்சித் தொண்டர்கள் 50 பேர் கைதுசெய்யப்பட்டனர்.

கரூரில் பல்வேறு தமிழர் அமைப்புகளைச் சேர்ந்த 150 பேர் ராஜபக்சேவை கண்டித்து கருப்புக் கொடியுடன் ஆர்ப்பாட்டம் நடத்தி கைதாகினர்.

நாமக்கல்லில் போலீஸ் தடையைமீறி கருப்புக் கொடி ஆர்ப்பாட்டத்தில் ஈடுபட்ட 50 மதிமுகவினர் கைது செய்யப்பட்டனர்.

கோவையில் ரயில் மறியல்

கோவையில் ரயில் மறியலில் ஈடுபட்ட விடுதலைச் சிறுத்தைகளைச் சேர்ந்த 100க்கும் மேற்பட்டோர் கைதானார்கள்.

ரயில் நிலையம் முன்பு கருப்புக்கொடிகளுடன் திரண்ட அவர்கள் திடுதிடுவென ரயில் நிலையத்திற்குள் ஓடினர். இதை எதிர்பாராத போலீஸார் அவர்களை விரட்டிச் சென்று பிடித்துக் கைது செய்தனர்.

பல்வேறு கட்சிகள்சார்பில் சென்னையில் உள்ள இலங்கை துணைத் தூதரகத்தை முற்றுகையிடும் போராட்டம் அறிவிக்கப்பட்டிருப்பதால் துணைத் தூதரகத்திற்கு பலத்த பாதுகாப்பு அளிக்கப்பட்டுள்ளது.

மாவட்டத் தலைநகரங்கள் அனைத்திலும் மதிமுக சார்பில் கண்டன ஆர்ப்பாட்டங்கள் நடத்தன. பல நூறு பேர் கைதானார்கள்.

43 தமிழ்ப் புலிகள் கைது

தேனியில் ராஜபக்சே வருகையை எதிர்த்து கருப்புக் கொடிகளுடன் ஆர்ப்பாட்டம் நடத்திய தமிழ்ப் புலிகள் அமைப்பினர் 43 பேர்கைது செய்யப்பட்டனர்.

சிவகங்கையில், கருப்புக்கொடிகளுடன் ஆர்ப்பாட்டத்தில் ஈடுபட்ட எம்.எல்.ஏ குணசேகரன் உள்ளிட்ட 120 பேர் கைது செய்யப்பட்டனர்.

மயிலாடுதுறையில் ராஜபக்சேவின் கொடும்பாவி தீவைத்துக் கொளுத்தப்பட்டது. இதில் ஈடுபட்ட 20 பேரை போலீஸார் கைது செய்தனர்.

பெங்களூரிலும் ஆர்ப்பாட்டம்…

பெங்களூரில் பல்வேறு தமிழ் அமைப்புகள் ராஜபக்சே வருகையை எதிர்த்து ஆர்ப்பாட்டம் செய்தனர்.

பெங்களூர் மகாத்மா காந்தி சாலையில் உள்ள காந்தி சிலை முன் கருப்புக் கொடியுடன் தமிழ் அமைப்புகள் ஆர்ப்பாட்டம் நடத்தின.​ இதில் மனித நேய கூட்டமைப்பின் ​அமைப்பாளர் மா.ராவணன் உள்பட பலர் கலந்து கொண்டனர்.

அதேபோல் பெரியார் நகர் சர்க்கிளிலும் கருப்புக் கொடி ஆர்ப்பாட்டம் நடத்தப்பட்டது.

Related Posts with Thumbnails