BREAKING NEWS
Search

‘ரஜினியும் கமலும் என் வழிகாட்டிகள், அவர்கள் வழியில்…’- ஷாம் பேட்டி

‘ரஜினியும் கமலும் என்  வழிகாட்டிகள்… அவர்கள் வழியில் கேரக்டருக்காக எதையும் செய்வான் இந்த ஷாம்!’


சினிமாவில் தன் கேரக்டருக்காக நடிகர் ஷாம் செய்திருக்கும் ஒரு வேலை பலரையும் அதிரவைத்திருக்கிறது. எப்படிய்யா இதெல்லாம் முடியும் என்கிறார்கள் சக நடிகர்கள்… அப்படி என்ன செய்திருக்கிறார்?

படத்தின் கேரக்டருக்காக சில ஹீரோக்கள் தாடியும் நீண்ட தலை முடியும் வளர்த்து வித்தியாசம் காட்டுவார்கள். அல்லது, மொட்டை அடிப்பார்கள். உடம்பை ஏத்துவதும் இறக்குவதும் தவிர, சில சண்டைக் காட்சிகளில் ரிஸ்க் கூட எடுப்பார்கள்.

ஆனால் இதிலிருந்து வித்தியாசப்பட்டு நடிகர் ஷாம், கட்டையால் கண்ணுக்கு கீழே ஓங்கி அடித்தால் கண்கள் எப்படி வீங்குமோ அவ்வளவு பெரிதாக வீங்க வைத்து நடித்திருக்கிறார். ‘6’ என்ற படத்தின் கிளைமாக்ஸ் காட்சிக்காக தமிழ் சினிமாவில் யாரு எடுத்திராத ரிஸ்கை எடுத்திருக்கிறார் ஷாம்.

அவரிடம் பேசியபோது, “கிட்டத்தட்ட பத்து நாட்கள் தூங்காமல் இருந்து அந்த தோற்றத்தை கொண்டு வந்தேன்.. வி இசட். துரை இயக்கத்தில் இப்போது ”6 ” என்ற படத்தில் நடித்து வருகிறேன்.

ஆறு கெட் அப், ஆறு மாநிலங்கள், ஆறு மெழுகுவர்த்திகள் என்று ஆறு அர்த்தம் கொண்ட சம்பவங்கள் இடம்பெறும்.

இந்த படத்தின் கிளைமாக்ஸ் காட்சிக்காக 89 கிலோ எடையிலிருந்து 72கிலோவாக எடையைக் குறைத்தேன். கிட்டத்தட்ட ஒருவருடம் தாடியும் நீண்ட முடியுமாக ஆறு மாநிலங்களில் சுற்றித்திரிந்து இந்த படத்தை உருவாக்கியுள்ளோம்.

இதையும் தாண்டி படத்திற்கு இன்னும் எஃபெக்ட் தேவை என டைரக்டர் சொல்லிக்கொண்டே இருந்தார். அப்போதுதான் இயக்குனர் துரையிடம், ‘நான் கண்களை இப்படி வீங்க வைத்து வருகிறேன். அதற்கு ஒரு பத்து நாள் தூங்காமல் இருக்கவேண்டும் என்றேன். அவர், அது முடியுமா? ஆபத்தாச்சே? மற்ற இடமென்றால் பரவாயில்லை.. கண்ணில் போய் ரிஸ்க் எடுக்க வேண்டுமா? வீக்கம் குறையாவிட்டால் வாழ்க்கை பூரா கண்தெரியாமல் போக நேரிடும். தவிர நீ ஒரு நடிகன். நடிகனுக்கு முகம்தான் முக்கியம் . அந்த அழகு இந்த படத்துக்கு பிறகும் வேண்டும். வேண்டாம் ஷாம் ரிஸ்க்,’ என்றார்.

இருந்தாலும் இந்த படத்தில் என் முழு அர்ப்பணிப்பையும் காட்டி இருக்கேன். இந்த படம் எனக்கு ரொம்ப முக்கியம். அதனால் செய்தே தீருவேன் என்று பிடிவாதமாக சொல்லிவிட்டு சென்றுவிட்டேன்.


இடையில் ஒருநாள் இயக்குனருக்கு போன் செய்து இன்னும் நான்கு நாட்கள் கழித்து ஷூட்டிங் வைத்துக்கொள்ளுங்கள் என்று சொல்லி வைத்துவிட்டேன்..

எல்லோரும் ஷூட்டிங் ஸ்பாட்டில் தயாராக காத்திருக்க நான் போய் இறங்கினேன். என் கண்ணைக் கண்ட அனைவருக்கும் அதிர்ச்சி. சில மணி நேரத்துக்கு என் கண்களைப் பார்க்கவே பயந்தார்கள்.

கடவுள் புண்ணியம் மீண்டும் என் கண்கள் பழைய நிலைக்கு ஒரு வாரம் கழித்து திரும்பியது. இதில் ஒரு துளி மேக் அப் கூட நாங்கள் பயன்படுத்தவில்லை. சினிமாதான் எனக்கு எல்லாம். அதற்காக ஷாம் எதையும் செய்வான் என்பதை இந்த 6 படம் உலகிற்கு சொல்லும்.

ரஜினி – கமல்

கேரக்டருக்காக மெனக்கெடும் விஷயத்தில் ரஜினி சார், கமல் சார் இருவருமே என் வழிகாட்டிகள். எந்திரனில் ரஜினி சார் பட்ட கஷ்டங்களைப் பார்த்து பிரமித்தேன். அவர் இருக்கும் உயரத்துக்கு இப்படியெல்லாம் செய்ய வேண்டியதே இல்லை. ஆனால் கேரக்டருக்காக நாளெல்லாம் ஒரு டப்பில் படுத்திருந்ததும், உடலையே கெமிக்கல் கலவைக்குள் அழுத்திக் கொண்டதும் சாதாரண விஷயமா….

அதே போல, கமல் சார் தன் கேரக்டருக்காக எத்தனையோ ரிஸ்குகளை எடுத்தவர். அவர்கள் வழியில் பயணிக்க முயற்சிக்கிறேன்,” என்றார்.

நிஜத்திலும் ஷாம் ஒரு தீவிர ரஜினி ரசிகர். ரஜினி பிறந்த நாள் விழாக்களைத் தவற விடாதவர். ரசிகர்களுடன் ரசிகராக ரஜினி பிறந்த தினத்தைக் கொண்டாடுபவர்.

ஒரு ரஜினி ரசிகரின் தீவிர சினிமா முயற்சிக்கு பெரிய வெற்றி கிட்டட்டும்!

-என்வழி செய்திகள்




5 thoughts on “‘ரஜினியும் கமலும் என் வழிகாட்டிகள், அவர்கள் வழியில்…’- ஷாம் பேட்டி

  1. குமரன்

    பிரமிக்க வைக்கும் முயற்சி. வெற்றி பெற வாழ்த்துக்கள்.

  2. மு. செந்தில் குமார்

    “ஒரு ரஜினி ரசிகரின் தீவிர சினிமா முயற்சிக்கு பெரிய வெற்றி கிட்டட்டும்!”

    நிச்சயமாக.

  3. பாவலன்

    ‘முயற்சி திருவினை ஆக்கும்’ என்பார் வள்ளுவர்.

    ஷாமின் படம் வெற்றி அடைய `என் வழி’ நண்பர்கள் வாழ்த்துகிறோம்.

    -பாவலன்

Leave a Reply

Your email address will not be published. Required fields are marked *