BREAKING NEWS
Search

சென்னைக்கு மட்டும் 2 மணி நேரம்.. மீதி தமிழகத்துக்கு கணக்கு வழக்கின்றி மின்வெட்டு!!

சென்னைக்கு மட்டும் 2 மணி நேரம்.. மீதி தமிழகத்துக்கு கணக்கு வழக்கின்றி மின்வெட்டு!!

powercut-mdu2

மதுரை உழவன் உணவகத்தில்–

சென்னை: மொத்த தமிழகமும் தாறுமாறான மின்வெட்டில் தவித்துக் கொண்டிருக்க, 24 மணிநேரமும் மின்சாரம் அனுபவித்த சென்னைக்கு, திங்கள்கிழமையிலிருந்து 2 மணி நேரம் மின்வெட்டு அமலுக்கு வந்தது.

அதிமுக அரசு பதவி ஏற்றதிலிருந்து மின்வெட்டு பிரச்சினை தீர்க்க முடியாத ஒன்றாக உள்ளது. திமுக ஆட்சியிலாவது மின்சாரம் ஒன்று முதல் நான்கு மணி நேரம் வரை இல்லாமல் இருந்தது.

ஆனால் அதிமுக ஆட்சியிலோ வரலாறு காணாத அளவுக்கு மின்வெட்டு. கிராமப்புற தமிழகத்தில் தொடர்ச்சியாக ஒரு மணிநேரம் மின்சாரம் வருவதே சாதனை என்பதுதான் நிலைமை.

ஆட்சிக்கு வந்ததும் மின்வெட்டுக்குக் காரணமே திமுகதான் என்று திட்டியதோடு முதல் மூன்று மாதங்களில் மின்வெட்டை ஒழித்துவிடுவோம் என முழங்கிய முதல்வர் ஜெயலலிதாவும், அவரது அமைச்சர்களும், இதோ.. மூன்றாண்டுகள் முடியும் தறுவாயிலும் அதே பல்லவியைப் பாடிக் கொண்டுள்ளனர்.

தமிழகத்தின் சிறு, குறு தொழில்கள் பலமாக நசிவுக்குள்ளாகியுள்ளன இந்த மின்வெட்டுப் பிரச்சினையால். திமுக ஆட்சியில் பாதி நேரமாவது உற்பத்தியை செய்ய முடிந்தது. இப்போதோ, முழுமையாக தொழிற்கூடங்களை மூடிவிட்டு, தொழிலாளர்களை வீட்டுக்கு அனுப்பிக் கொண்டிருக்கின்றனர் சிறு தொழில் முனைவோர்கள்.

விவசாயத்தின் நிலை சொல்லத்தரமற்றதாகிவிட்டது. மூன்றே மணிநேரம்தான் விவசாயத்துக்கான மும்முனை மின்சாரம். இப்போது அதிலும் மண். தொடர்ச்சியாக மூன்று மணிநேரம் தருவதில்லை. ஒருமணி நேரம் மின்சாரம், அடுத்த ஒருமணிநேரம் மின்வெட்டு, மீண்டும் ஒரு மணிநேரம் மின்சாரம். அவ்வளவுதான் விவசாயத்துக்கு மின்சாரம்… அதாவது வெறும் இரண்டு மணிநேரம்!

இதனால் கிராமங்களில் குடிநீர் கூட கிடைக்காமல், பக்கத்து பக்கத்து கிராமங்களுக்கு தண்ணீருக்குப் படையெடுத்து, அது சாதிச் சண்டையில் வந்து நிற்கிறது.

power cut  - Madurai

இதுவும் மதுரைதான் – இருட்டில் ஷேவ் செய்யும் ஒரு சலூன்காரர் (ரெண்டு பேருக்கும் என்னா தைரியம்!!)

இடையில் சில மாதங்கள் மட்டும் பரவாயில்லாமல் மின்சாரம் கிடைத்தது, அதுவும் காற்றாலைகள் புண்ணியத்தில்.

இப்போது மீண்டும் முழுமையான மின்வெட்டு. மொத்த தமிழகமும் இப்படி மின்வெட்டில் தத்தளிக்கையில், தலை நகர் சென்னை மட்டும் 24 மணி நேரமும் மின்சாரம் பெற்று வந்தது, கடந்த ஞாயிறு வரை.

நேற்று, திங்கள்கிழமை முதல் இரண்டு மணிநேர மின்வெட்டை அரசு அதிகாரப்பூர்வமாக அறிவித்து, அமல்படுத்தியும்விட்டது.

சில இடங்களில் இரண்டு மணிநேரம் தொடர்ச்சியாக மின்வெட்டு. சில இடங்களில் ஒரு மணிநேரக் கணக்கில் இரு முறை மின்வெட்டு. இன்னும் சில இடங்களில் அரை மணி கணக்கில் நான்கு முறை கட் பண்ணியிருக்கிறார்கள்.

பதவியில் உட்கார்ந்து மூன்றாண்டுகளான பிறகும், முந்தைய ஆட்சியாளர்களைக் குறை சொல்லிக் கொண்டிருப்பது எந்த வகை நிர்வாகத் திறனோ… இருக்கிற மின் நிலையங்களை இந்த அரசால் ஒழுங்காக பராமரிக்கவும் முடியவில்லை… புதிதாக ஒரு மின்திட்டத்தைக் கூட உருவாக்கி அறிவிக்கவும் இவர்களால் முடியவில்லை என்பதே இவர்களின் தொலைநோக்கின்மைக்கு உதாரணம்.

பதவி முடியும் தருணத்திலும், மீண்டும் என்னை பதவியில் அமர்த்துங்கள், ஆறே மாதங்களில் மின்வெட்டை ஒழிப்பேன் என 2016-லும் ஜெயலலிதா முழங்கினாலும் ஆச்சர்யமில்லை!

-என்வழி ஸ்பெஷல்




Leave a Reply

Your email address will not be published. Required fields are marked *