BREAKING NEWS
Search

மலேசியாவில் கைதிகளைவிட மோசமாய் நடத்தப்படும் இலங்கை தமிழர்கள்!

மலேசியாவில் கைதிகளைவிட மோசமாய் நடத்தப்படும் இலங்கை தமிழர்கள்!

கோலாலம்பூர்: இலங்கையிலிருந்து தப்பி மலேசிய கடலில் கப்பலில் சென்றபோது கைது செய்யப்பட்ட 75 இலங்கைத் தமிழர்கள் கைதிகளை விட மோசமாக நடத்தப்படுவதாக செய்திகள் வெளியாகியுள்ளன. பின்பக்கம் விலங்கு பூட்டப்பட்ட நிலையில் அவர்கள் அமரவைக்கப்பட்டுள்ள படங்கள் வெளியாகி அதிர்ச்சியலைகளை ஏற்படுத்தியுள்ளது.

இலங்கையின் வட பகுதியிலுள்ள முகாம்களிலிருந்து 6 பெண்கள், 8 குழந்தைகள் உட்பட 75 பேர் கடந்த 19 ஆம் திகதி சிறிய கப்பல் மூலம் அடைக்கலம் கொடுக்கும் நாட்டைத் தேடிப் புறப்பட்டனர். அந்தக் கப்பல் மலேசிய கடலில் சென்றபோது மலேசிய போலீசால் கைது செய்யப்பட்டு கைவிலங்கிடப்பட்ட நிலையில் முகாம்களில் அடைக்கப்பட்டனர்.

இதனைத் தொடர்ந்து பெண்கள், குழந்தைகள், ஆண்கள் என தனித்தனியாக முகாம்களுக்கு அனுப்பப்பட்டதாகவும் அங்குள்ள கோலாலம்பூர் சர்வதேச விமான நிலையத்திற்கு அருகில் உள்ள முகாமொன்றில் ஆண்களையும், மற்றுமொரு முகாமில் பெண்களையும் பிறிதொன்றில் குழந்தைகளையும் தனித்தனியாகப் பிரித்து அடைத்து வைத்ததாகவும் கூறப்படுகிறது. இவர்கள் மிகச் சிறிய அறையில் கைவிலங்குடன் தவித்து வருவதாக தகவல்கள் தெரிவிக்கின்றன.

மேலும் தனி முகாம்களில் அடைத்து வைக்கப்பட்டுள்ள பெண்கள் தங்கள் குழந்தைகளை ஒப்படைக்குமாறு உண்ணாவிரதப் போராட்டங்களிலும் ஈடுபட்டனர்.

இது குறித்து அவர்கள் கூறுகையில், “எங்களுக்கு சுகாதாரமற்ற அறைகளே ஒதுக்கப்பட்டுள்ளன. இவை வதை முகாம்கள் போலவே உள்ளன. எங்களை அகதிகளைப் போன்று நடத்தாமல் கைதிகளைப் போன்றே நடத்துகின்றனர். எங்கள் குழந்தைகளின் நிலைமை என்னவென்றே தெரியவில்லை.

எங்களைக் கைதியாக நடத்தாதீர்கள்; அகதிகளாக நடத்துங்கள். தமிழக தல்வர் கருணாநிதியாவது எங்கள் மீது இரக்கம் கொண்டு எங்களை மீட்கவேண்டும். எங்களுக்கு ஆதரவளித்து தமிழகத்திற்கு அழைத்துச்செல்ல வேண்டும். எங்கள் குழந்தைகளை எம்மிடம் ஒப்படைக்க வேண்டும்” என்று கூறி 6 இலங்கைப் பெண்களும் உண்ணாவிரதம் இருந்தனர்.

தங்களை அகதிகளாக ஏற்கும் ஏதேனும் ஒரு நாட்டுக்கு அனுப்பிவிடுமாறு இந்த தமிழர்கள் விடுத்த கோரிக்கையையும் மலேசியா நிராகரித்து விட்டதாகக் கூறப்படுகிறது.

பினாங்கு துணை முதல்வர் ஆறுதல்

இந்நிலையில், அடைத்து வைக்கப்பட்டுள்ள தமிழர்களைத் தொடர்பு கொண்டு ஆறுதல் கூறியுள்ளார் பினாங்கு துணை முதல்வர் ராமசாமி,

“உங்களுக்கு எந்த கொடுமையும் நேராது. இப்போது இருக்கும் முகாமில் வசதிகள் குறைவாக இருந்தாலும் பொறுத்துக் கொள்ள வேண்டும். மிக விரைவிலேயே உங்களை நீங்கள் விரும்பும் நாட்டிற்கு அனுப்ப ஏற்பாடு செய்து கொண்டிருக்கிறோம்.

அதற்காக உள்துறை அமைச்சகத்திற்கும், ஐ.நா.வின் அகதிகளுக்கான அதிகாரிகளிடமும் பேசிக் கொண்டிருக்கிறோம். தமிழக முதல்வர் கருணாநிதியுடனும் இது தொடர்பாக பேச முடிவு செய்துள்ளோம். விரைவிலேயே நல்ல தீர்வு கிடைக்கும். அதனால் கவலைப்படாமல் இருங்கள்” என்று கூறியுள்ளார்.




2 thoughts on “மலேசியாவில் கைதிகளைவிட மோசமாய் நடத்தப்படும் இலங்கை தமிழர்கள்!

  1. Sivaji Rao veriyan

    ஆறுதலாக பேசுவதற்காகவாவது யாரோ ஒருவர் இருப்பது கொஞ்சம் நிறைவாக உள்ளது.

  2. mariappan

    இலங்கை தமிழ் மக்களுக்கு சொந்த நாட்டிலும் அவஸ்தை வெளி நாட்டிலும் அவஸ்தை. தமிழின தலைவர் மகளுக்கும் பேரனுக்கும் பதவிக்கு அலைகிறார். அம்மக்களை ஆண்டவன்தான் காப்பாற்றனும்.

Leave a Reply

Your email address will not be published. Required fields are marked *