BREAKING NEWS
Search

கடல் அலைகளின் முற்றுகையில் மும்பை!

கடல் அலைகளின் முற்றுகையில் மும்பை!

மும்பை: மும்பையில் நேற்று முதல் கடல் கடும் சீற்றத்துடன் காணப்படுகிறது. கடந்த 100 ஆண்டுகளில் இல்லாத அளவுக்கு இன்று பிற்பகலில் ராட்சத அலைகள் மும்பை மாநகரைத் தாக்கும் என்று எச்சரிக்கப்பட்டுள்ளது. இதனால் மும்பை கடலோரப் பகுதிகளில் வசிக்கும் மக்கள் அங்கிருந்து வெளியேற்றப்பட்டனர். INDIA-WEATHER-TIDES

மும்பையி்ல 23ம் தேதி முதல் 25ம் தேதி வரை கடல் சீற்றம் கடுமையாக இருக்கும் என ஏற்கனவே வானிலை ஆய்வு மையம் எச்சரித்திருந்தது. பொதுவாக வானிலை மையங்களின் அறிவிப்புக்கு நேர் மாறாகவே இயற்கை நிகழ்வுகள் நடப்பதால், மக்கள் இதைப் பெரிதாக எடுத்துக் கொள்ளவில்லை!

ஆனால் நேற்று கடும் சீற்றத்துடன் காணப்பட்டது கடல். கடல் நீர் பல பகுதிகளில் ஊருக்குள் புகுந்ததால் மக்கள் பீதியடைந்தனர். கொலாபா, தாதர் உள்ளிட்ட பகுதிகளில் வீடுகளுக்குள் கடல் நீர் புகுந்தது.

தாராவி, மாஹிம், பார்லே, சயான், சான்டாக்ரூஸ் உள்ளிட்ட பகுதிகளில் நல்ல மழையும் பெய்தது.tide-6

பல இடங்களில் கடல் அலைகள் பெரிய அளவில் எழுந்தபடி இருந்தன.

பல இடங்களில் கடல் நீர் புகுந்ததால் சாலையில் வெள்ளம் என கடல் நீர் ஓடியது. கொலாபா, கீதா நகர் பகுதியில் புகுந்த கடல் நீரால் பல வீடுகளுக்குள் தணணீர் புகுந்தது. சில குடிசைகள் அடித்துச் செல்லப்பட்டன.

இந்த நிலையில், இன்று பிற்பகல் 2 மணிக்கு மேல் 5 மீட்டர் உயரத்திற்கு ராட்சத அலைகள் தொடர்ந்து எழும் என எச்சரிக்கப்பட்டுள்ளது. கடந்த 100 ஆண்டுகளில் இந்த அளவுக்கு பேரலைகள் வந்ததில்லை என்பதால் மக்கள் மிகுந்த எச்சரிக்கையுடன் இருக்கும்படி கேட்டுக் கொள்ளப்பட்டுள்ளது.

பிற்பகல் 2 மணிக்கு மேல் இந்த ராட்சத அலைகள் எழும் எனவும், மக்கள் தேவையில்லாமல் வீடுகளை விட்டு வெளியே வர வேண்டாம் எனவும், கடற்கரைக்கு யாரும் போக வேண்டாம் எனவும் கேட்டுக் கொள்ளப்பட்டுள்ளது.

தீயணைப்புப் படையினர், கடலோரக் காவல் படையினர், கடற்படையினர் உஷார் நிலையில் வைக்கப்பட்டுள்ளனர். நீச்சல் வீரர்களும் தயார் நிலையில் வைக்கப்பட்டுள்ளனர்.tide-5

செய்தித்தாள்கள், டிவி, ரேடியோக்கள் மூலம் மக்களுக்கு எச்சரிக்கைச் செய்திகள் விடப்பட்டுள்ளன.

தாழ்வான பகுதிகளில் வசிப்போர், கடலையொட்டியுள்ள பகுதிகளில் வசிப்போர் பாதுகாப்பான இடங்களுக்கு அப்புறப்படுத்தப்பட்டு வருகின்றனர்.

மேலும், தேவையான உணவு, குடிநீர் ஆகியவற்றை இருப்பு வைத்துக் கொள்ளுமாறும் மக்களை மகாராஷ்டிர அரசு கேட்டுக் கொண்டுள்ளது.

கடலோரம் உள்ள பள்ளிகளுக்கு விடுமுறை விடப்பட்டுள்ளது. நகர் முழுவதும் ஒருவித அச்ச நிலை காணப்படுகிறது.

சென்னையிலும்…

மும்பை அளவுக்கு இல்லாவிட்டாலும், சென்னையிலும் கடல் கொந்தளிப்புடனே காணப்பட்டது. மெரினா மற்றும் பட்டினப்பாக்கத்தில் பெருமளவு அலைகள் மணற்பரப்பு வரை வந்து போயின. எனவே போலீசார் குவிக்கப்பட்டுள்ளனர்.

பட்டினப்பாக்கத்தில் உள்ள தேவாலயத்தை கடல் நீர் சூழந்துள்ளதாகத் தெரிகிறது. மாலையில் சீற்றம் அதிகரிக்கக் கூடும் என வானிலை மையம் எச்சரித்துள்ளது.




Leave a Reply

Your email address will not be published. Required fields are marked *