BREAKING NEWS
Search

உலகத் தமிழ் செம்மொழி மாநாடு இன்று தொடக்கம்!

உலகத் தமிழறிஞர்கள் பங்குபெறும் தமிழ் செம்மொழி மாநாடு இன்று ஆரம்பம்

கோயம்பத்தூர்: முதலாவது உலகத் தமிழ்ச் செம்மொழி மாநாடு இன்று காலை 10.30 மணிக்கு கோவை மாநகரில் வெகு கோலாகலமாகத் தொடங்குகிறது.

விழாவுக்கான அனைத்து ஏற்பாடுகளும் தயாராகி விட்டன. முதல்வர் கருணாநிதி முன் கூட்டியே கோவை சென்று கடைசி நேர பணிகளை நேரில் பார்வையிட்டார்.

இதுவரை உலகத் தமிழர்கள் உலகத் தமிழ் மாநாடுகளைத்தான் கண்டு வந்துள்ளனர். தமிழுக்கு செம்மொழி அந்தஸ்து கிடைத்த பிறகு முதல் முறையாக நடக்கும் மாநாடு இது.

5 நாட்கள் நடைபெறும் இந்த மாநாட்டில் நூற்றுக்கணக்கான தமிழறிஞர்கள், பல்வேறு துறைசார்ந்த நிபுணர்கள் பங்கேற்கின்றனர். விழா முழுவதும் கோவை கொடிசியா அரங்கிலும், அதன் வளாகத்தில் அமைக்கப்பட்டுள்ள பிரமாண்ட பந்தலிலும் நடக்கிறது.

காலை 10.30 மணிக்கு துவக்கி வைக்கும் பிரதிபா பாட்டீல்!

நாளை காலை 10.30 மணிக்கு மாநாடு தொடங்குகிறது. முதலில் தமிழ்த் தாய் வாழ்த்து பாடப்படும். பின்னர் உலகத் தமிழ்ச் செம்மொழி மாநாட்டின் மைய நோக்குப் பாடல் ஒலிபரப்பாகும்.

அதன் பின்னர் முதல்வர் கருணாநிதி தலைமை தாங்குகிறார். துணை முதல்வர் மு.க.ஸ்டாலின் வரவேற்புரையாற்றுகிறார். ஆளுநர் பர்னாலா சிறப்பு மலரை வெளியிட, நிதியமைச்சர் அன்பழகன் தகுதியுரையாற்றுவார்.

அதைத் தொடர்ந்து கலைஞர் மு.கருணாநிதி செம்மொழித் தமிழ் விருது வழங்கும் நிகழ்ச்சி இடம்பெறும். பின்லாந்து தமிழறிஞர் அஸ்கோபர் போலோவுக்கு இந்த விருதினை குடியரசுத் தலைவர் பிரதீபா பாட்டீல் வழங்குகிறார்.

இதையடுத்து முதல்வர் கருணாநிதியின் தலைமையுரை இடம் பெறுகிறது. தொடர்ந்து ஆளுநர் பர்னாலா சிறப்புரையாற்றுகிறார். தொடர்ந்து குடியரசுத் தலைவர் பிரதீபா பாட்டீல் தொடக்க உரை நிகழ்த்துகிறார்.

அமெரிக்கத் தமிழறிஞர் ஜார்ஜ் ஹார்ட், ஈழத் தமிழறிஞர் கார்த்திகேசு சிவத்தம்பி, தமிழகத்தின் வா.சே. குழந்தைச்சாமி ஆகியோர் வாழ்த்துரை நிகழ்த்துகிறார்கள். தலைமைச் செயலாளர் ஸ்ரீபதியின் நன்றி உரையுடன் காலை நிகழ்ச்சி முடிவடைகிறது.

மாலையில் இனியவை நாற்பது… ஊர்வலம்!

இன்று மாலை 4 மணிக்கு ‘இனியவை நாற்பது’ என்ற தலைப்பிலான பிரமாண்ட பேரணி தொடங்குகிறது. இதில் தமிழகத்தின் கலை, இலக்கியம், வரலாற்றுச் சிறப்பை வெளிக்காட்டும் வகையிலான 40 அலங்கார வண்டிகள் இடம் பெற்று பேரணியாக கிட்டத்தட்ட 9 கிலோமீட்டர் தொலைவுக்கு அணி வகுத்துச் செல்கின்றன.

கோவை வ.உ.சி. பூங்காவில் தொடங்கும் இந்தப் பேரணி, அவினாசி சாலை வழியாக, மாநாட்டு வளாகம் வரை நடக்கிறது.

இந்தப் பேரணியை குடியரசுத் தலைவர் பிரதீபா பாட்டீல், முதல்வர் கருணாநிதி உள்ளிட்ட தலைவர்கள் லட்சுமி மில் அருகே அமைக்கப்பட்டுள்ள அலங்கார மேடையிலிருந்து பார்வையிடுகிறார்கள்.

இதேபோல சாலையின் 6 இடங்களில் மேடைகள் போடப்பட்டுள்ளன. அங்கு பன்னாட்டுத் தமிழறிஞர்கள், முக்கியப் பிரமுகர்கள் அமர்ந்து காண்பார்கள்.

முதல் நாள் நிகழ்ச்சியைத் தொடர்ந்து பல்வேறு ஆய்வரங்கங்கள், கவியரங்குகள், கருத்தரங்குகள் என ஐந்து நாட்கள் மாநாடு நடக்கிறது.

செம்மொழி மாநாட்டையொட்டி பல்வேறு கலை நிகழ்ச்சிகள் உள்ளிட்டவையும் நடைபெறவுள்ளன.

வரலாறு காணாத பாதுகாப்பு

உலகத் தமிழ்ச் செம்மொழி மாநாட்டுக்காக கோவை நகரமே திருவிழாக் கோலம் பூண்டுள்ளது. அனைத்து முக்கியச் சாலைகளும் புதுப் பொலிவுடன் காட்சி தருகின்றன. சாலை மின் விளக்குகள் அனைத்தும் சீராக்கப்பட்டு இரவைப் பகலாக்கும் வகையில் பளிச்சிடுகின்றன. அனைத்துப் பகுதிகளிலும் அலங்கார விளக்குகள் ஜொலிக்கின்றன.

பாதுகாப்புக்காக மட்டும் 11 ஆயிரம் போலீஸார் குவிக்கப்பட்டுள்ளனர். மோப்ப நாய்ப் படைகள், வெடிகுண்டு நிபுணர்கள் இரவு பகலாக நகரையே தங்களது பாதுகாப்பு வளையத்தின் கீழ் கொண்டு வந்து கண்காணித்து வருகின்றனர்.

ரயில் நிலையங்கள், விமான நிலையம் , பஸ் நிலையங்கள், முக்கிய வணிக வளாகங்கள் உள்ளிட்டவற்றில் தீவிர கண்காணிப்பு மற்றும் பாதுகாப்பு மேற்கொள்ளப்பட்டுள்ளது.

விமானம் மூலமும் பாதுகாப்பு கண்காணிக்கப்பட்டு வருகிறது.

தங்கும் வசதி -சாப்பாடு

மாநாட்டுக்காக வரும் முக்கியப் பிரமுகர்களுக்காக, தமிழறிஞர்களுக்காக திருமண மண்டபங்கள், ஹோட்டல்கள், லாட்ஜுகள் என அனைத்தும் புக் செய்யப்பட்டுள்ளன.

இதனால் சாதாரண பயணிகள் தங்குவதற்கு விடுதிகள் கிடைக்காத நிலை ஏற்பட்டுள்ளது.

அதேபோல உணவு வசதியும் சிறப்பாக செய்யப்பட்டுள்ளது. தமிழறிஞர்களுக்கு மட்டுமல்லாது, பொது மக்களுக்காகவும் சிறந்த உணவை அளிக்க ஏற்பாடு செய்துள்ளதாக முதல்வர் அறிவித்துள்ளார். இந்த உணவு குறைந்த விலையில் ஐந்து நாட்களும் கிடைக்க ஏற்பாடு செய்யப்பட்டுள்ளது.

சென்னையைச் சேர்ந்த அடையார் ஆனந்த பவன், வசந்த பவன் ஹோட்டல்கள் ஒப்பந்த அடிப்படையில் உணவு தயாரிப்புப் பணியில் ஈடுபட்டுள்ளன. மாநாட்டு வளாகத்துக்குள் ரூ 30க்கு சைவ உணவு கிடைக்கும்.

பொது மக்களுக்காக வழங்குவதற்காக நாலரை லட்சம் உணவுப் பொட்டலங்களாக தயாரித்து விற்கவுள்ளனர். முதல் நாளில் ஒன்றரை லட்சம் உணவுப் பொட்டலங்ளும், மற்ற 3 நாட்ளுக்கு தலா 50 ஆயிரம் பொட்டலங்களும், கடைசி நாளில் ஒன்றரை லட்சம் உணவுப் பொட்டலங்களும் தயாரிக்கப்படுகின்றன.

இதுகுறித்து தமிழ்நாடு ஹோட்டல்கள் சங்கத் தலைவரும், வசந்த பவன் உரி்மையாளருமான ரவி கூறுகையில், “செம்மொழி மாநாட்டிற்கு வரும் பொதுமக்களுக்கு அரசு சார்பில் குறைந்த விலையில் மதிய சாப்பாடு ஏற்பாடு செய்யப்பட்டுள்ளது. ரூ.59 மதிப்புள்ள சாப்பாடு ரூ.30-க்கு விற்கப்படுகிறது.

வெஜிடபிள் பிரியாணி, தயிர் சாதம், அரை லிட்டர் மினரல் வாட்டர் கேன், இனிப்பு, காரம், ஊறுகாய் பாக்கெட் அனைத்தும் இதில் அடங்கும். இதேபோல ஒவ்வொரு நாளும் சாம்பார் சாதம், புளி சாதம், தயிர் சாதம் என விதம் விதமான சாதங்களும் வழங்குகிறோம்” என்றார்.

கலை நிகழ்ச்சிகள், பிரமாண்டப் பேரணிகள், சொற்பொழிவுகள், ஆய்வரங்க அமர்வுகள், சுவையான உணவு என இன்று முதல் ஐந்து நாட்களுக்கு அமர்க்களப்பட உள்ளது கோவை நகரம்.




7 thoughts on “உலகத் தமிழ் செம்மொழி மாநாடு இன்று தொடக்கம்!

  1. RAMAN/

    என்னதான் நடக்கும் நடக்கட்டுமே
    இருட்டினில் நீதி மறையட்டுமே
    தன்னாலே வெளிவரும் தயங்காதே..
    தலைவன் இருக்கிறான் மயங்காதே

    பின்னாலே தெரிவது அடிச்சுவடு
    முன்னாலே இருப்பது அவன் வீடு
    நடுவினிலே நீ விளையாடு

    உலகத்தில் திருடர்கள் சரி பாதி
    ஊமைகள் குருடர்கள் அதில் பாதி
    கலகத்தில் பிறப்பதுதான் நீதி
    மனம் கலங்காதே மதிமயங்காதே
    கலங்காதே, மதிமயங்காதே

    மனதுக்கு மட்டும் பயந்துவிடு
    மானத்தை உடலில் கலந்துவிடு
    இருக்கின்ற வரையில் வாழ்ந்துவிடு
    இரண்டினில் ஒன்று பார்த்துவிடு
    இரண்டினில் ஒன்று பார்த்துவிடு

    என்னதான் நடக்கும் நடக்கட்டுமே
    இருட்டுனில் நீதி மறையட்டுமே
    தன்னாலே வெளிவரும் தயங்காதே
    தலைவன் இருக்கிறான் மயங்காதே!!

  2. Juu

    Proud to appreciate this event!!!
    Apart from issues,
    கலைஞரின் உண்மையான சாதனை.

  3. S.R.S.Manikandan

    Tamil annaiyin magudathil oru vairamaga indha manadu amaiyum.nam tamil inum valarchi pera indha manadu avasiyam..ithai yethirpavargal tamilukum tamilarkalukum yethiranavargal..nichayam manadu vetri perum..valga tamil..

  4. Manoharan

    உண்மையிலேயே கோவை வெகுவாக களை கட்டியுள்ளது.

Leave a Reply

Your email address will not be published. Required fields are marked *