BREAKING NEWS
Search

‘ஆக்கர் ஸ்டூடியோ’விலிருந்து விலகவில்லை! – வார்னர் பிரதர்ஸ்

‘ஆக்கர் ஸ்டூடியோ’விலிருந்து விலகவில்லை! – வார்னர் பிரதர்ஸ் அறிவிப்பு

சௌந்தர்யா ரஜினியின் ஆக்கர்ஸ் ஸ்டுடியோவுடனான கூட்டு ஒப்பந்தத்திலிருந்து விலகியதாக சொல்லப்படுபவை அனைத்தும் ஆதாரமற்றவை, வதந்திகள் என அறிவித்துள்ளது ஹாலிவுட்டின் வார்னர் பிரதர்ஸ் நிறுவனம். soundaryarajini

சூப்பர் ஸ்டார் ரஜினியின் இளைய மகள் சௌந்தர்யா ரஜினிக்கு சொந்தமான நிறுவனம், ஆக்கர் ஸ்டூடியோ. இந்த நிறுவனத்துடன் இணைந்து தமிழ் மற்றும் இதர தென்னிந்திய மொழிகளில் நிறைய படங்கள் தயாரிக்கப் போவதாக வார்னர் பிரதர்ஸ் அறிவித்திருந்தது.

தமிழில் முதல்படமாக ‘கோவா’வை இரு நிறுவனங்களும் இணைந்து தயாரிப்பதாக அறிவிக்கப்பட்டது. அதே போல சூப்பர் ஸ்டார் ரஜினியின் முதல் அனிமேஷன் படமான சுல்தான் – தி வாரியர் படத்தை வார்னர் பிரதர்ஸ் உலகம் முழுக்க வெளியிடுவதாகவும் அறிவிக்கப்பட்டுள்ளது.

இந்த நிலையில், ஆக்கர் ஸ்டூடியோவில் இருந்து வார்னர் பிரதர்ஸ் விலகிவிட்டதாக ஒரு வதந்தி பரவியது.

ஆனால் ‘வார்னர் பிரதர்ஸ் – ஆக்கர் ஸ்டுடியோ கூட்டணியில் பிரிவு இல்லை’ என்பதை ஏற்கெனவே நாம் செய்தியாக தெரிவித்திருந்தது நினைவிருக்கலாம். இதுகுறித்து சௌந்தர்யாவின் பேட்டியையும் நாம் வெளியிட்டிருந்தோம்.

இப்போது வார்னர் பிரதர்ஸ் நிறுவனமே இதுகுறித்து அதிகாரப்பூர்வமாக அறிவித்துள்ளது.

பிரிவு குறித்த செய்தி உண்மையல்ல என்று வார்னர் பிரதர்ஸ் துணைத்தலைவர் ரிச்சர்டு பாக்ஸ் கூறியுள்ளார்.

இதுபற்றி மேலும் அவர் கூறியதாவது:

“ஆக்கர் ஸ்டூடியோவுடன் நாங்கள் இணைந்து, தொடர்ந்து பணிபுரிகிறோம். எங்கள் 2 நிறுவனங்களும் இணைந்து தென்னிந்திய மொழிகளில் பல படங்களை தயாரிக்க திட்டமிட்டு இருக்கிறோம். அதற்கான ஆரம்பகட்ட வேலைகள் தொடங்கி விட்டன.

சரியான நேரத்தில், எங்கள் திட்டங்களை அறிவிப்போம். ஆக்கர் ஸ்டூடியோவில் இருந்து நாங்கள் விலகிவிட்டதாக வெளிவந்த தகவலில் உண்மை இல்லை,” என்றார் ரிச்சர்ட் பாக்ஸ்.

இதுகுறித்து சௌந்தர்யா ரஜினிகாந்த் கூறியதாவது:

“ஆக்கர் ஸ்டூடியோவும், வார்னர் பிரதர்சும் இணைந்து வெற்றிகரமாக செயல்பட்டுக் கொண்டிருக்கிறன. எங்கள் 2 நிறுவனங்களுக்கும் இடையே நல்ல நட்பு இருந்து வருகிறது.

எங்களின் புதிய திட்டங்களை மிக விரைவில் அறிவிக்க இருக்கிறோம். எங்களுக்கு எதிராக வதந்திகளும், கற்பனை செய்திகளும் பரப்பப்பட்டுள்ளன. அதை யாரும் நம்ப வேண்டாம். இது குறித்து ஏற்கெனவே பல முறை நான் தெளிவாக அறிவித்துள்ளேன். ஆனால் உண்மையைச் சொல்லும்போது அதைக் கண்டுகொள்ளாமல் விட்டுவிடுகிறார்கள். வதந்திகளுக்கு முக்கியத்துவம் தருகிறார்கள். இதைத் தவிர்க்க வேண்டும். என்னிடம் எப்போது வேண்டுமானாலும் விசாரிக்கலாம்…”, என்றார் சௌந்தர்யா.




One thought on “‘ஆக்கர் ஸ்டூடியோ’விலிருந்து விலகவில்லை! – வார்னர் பிரதர்ஸ்

  1. Shivaji

    சௌந்தர்யா உங்களுக்கான ஒரு அடையாளத்தை நீங்களே உருவாக்கி கொண்டு தலைவருக்கு பெருமையை உண்டாக்கி கொடுத்து உள்ளீர்கள் ! எங்களுக்கும் மகிழ்ச்சி !

    நீங்கள் வளம் பெற வாழ்த்துக்கள் !

    என்றும் அன்புடன்
    சிவாஜி

Leave a Reply

Your email address will not be published. Required fields are marked *